Rod’s Cornish Match Report – London Scottish (H)

Gans gwyns ha niwllaw lewya, ny veu gam uskis desevys. Dres hebma, mir scav orth an folen bara a dhysquedhas bos para dyffrans dhe Albanyon Loundres es dell yw usyes gans pymp po whegh gwrier yn prest dhyworth Caredin ha Harlequins, y’ga mysk keswlascor Statys Unys. Nyns o pell kyns an Vorladron dhe scorya aga hensa assay pan rug Callum Sirker y’n seythves mynysen a davas yn-dadn yn cornel an bord-scorya, gans treylyans sewen gans Arwel Robson. Yth esa an dhew bara owth assaya gwary rugby ygor, mes yth o an Vorladron neb a scoryas arta, an dro ma assay y’n cornel gans Tom Channon, yn udn sewya movyans cachya ha lewya. Y’n lacka prys Robson o ansewen gans an treylyans – 12-0. Pymp mynsen woja hebma, Alex o’Meara a dhalhednas y jons pan wrug y botyas yn-rag delivrans gwylls gans creswas Albanyon Loundres dhe scorya yn-dadn an peulyow. An Vorladron a gavas an chons scorya arta kens hanter-termyn, mes woja cachya yn clan an bel dhyworth linen duch 5-meter, an bel a veu kellys yn-rag yn udn settya an movyans cachya ha lewya. An scor raghedna a drigas orth 19-0 dhe hanter-termyn.

Keniver scoodhyer orth an fyt o sur y hwrussa an Vorladron cavos assay po dew moy y’n nessa hanter dhe dhiogely aga foynt mas, mes yn despit aga stryvyans an gwella, ny wrug hebma wharvos. Yn gwrianeth, Albanyon Loundres a gavas moy a jonsow yn hanter ma dhe scorya, mes po y a veu spalys ogas dhe’n linen, po knoukya an bel yn-rag po dres oll, dre dhefendyans crev an Vorladron, neb ny wrug fyllel gans udn dalhen. Studhow kewer a wrug tacklow cales rag an dhew bara der an enep gwary pur boos yn udn sugna nerth an warioryon. Dres hebma, ny wrug an Vorladron controlya tiredh, ha kelly niver a vovyansow omsettya. Ytho, an hanter a drigas heb scor vyth hag orth an whytel finel an scor o – An Voraldron Gernewek 19, Albanyon Loundres 0. Yth o gwayn ha folen ladn rag an Vorladron, mes gans an tull a fowt a boynt mas.